Mafube Besigheidsforum (MBF) neem met kommer kennis dat die Waarnemende Munisipale Bestuurder van Mafube Plaaslike Munisipaliteit (MPM), advokaat Mothusi Lepheana, op Vrydag 27 Oktober 2023 weer 'n kommunikasie aan werknemers uitgereik het dat daar 'n vertraging in die betaling van hul salarisse sou wees. Die rede wat gegee word, is dat MPM se "rekeninge sedert verlede week deur 'n krediteur op beslag gelê is".
Dit lyk dus asof die finansiële posisie by MPM nog verder verswak het as wat verwag was, maar daar kan nie gesê word dat die wanbetaling van salarisse vir enigiemand 'n verrassing is nie. Verslag na verslag weerspieël die treurige stand van sake by die munisipaliteit. Die Munisipale Bestuurder se artikel 52-kwartaalverslag dui aan dat daar op 'n maandelikse basis 'n salaristekort van R6,6-miljoen (R79-miljoen per jaar) is. Feitlik die hele “Equitable Share Grant” word vir salarisse gebruik en “niks bly oor vir die bedrywighede en dienslewering nie.” MPM het R12-miljoen van 'n voorwaardelike infrastruktuurtoekenning verbeur omdat dit nie gebruik was vir die doel waarvoor dit bestem is nie. Tussen die SAID en die Munisipale Werkers Aftreefonds, is beslag gelê op 'n verdere R12 605 049 uit MPM se primêre bankrekening. Onreëlmatige uitgawes vir die maand Junie 2023 het R83 573.80 beloop terwyl vrugtelose en verkwistende uitgawes vir die jaar (2022/23) R51 822 442 beloop het, wat dui daarop dat rente op agterstallige betalings nou rondom R5-miljoen per maand opeis.
Die invorderingskoers vir munisipale diensheffings en tariewe het gedurende Junie 2023 'n laagtepunt van 15% bereik.
Aan die einde van die dag skuld MPM krediteure 'n totaal van R958-miljoen teen die verhaalbare agterstallige diensskuld van R420-miljoen, wat beteken dat die munisipaliteit tegnies insolvent is met R538-miljoen.
Ten spyte van die verpligte provinsiale ingryping en finansiële herstelplan (MFRP), word niks wesenlik gedoen om die situasie te verlig nie. Die voorstel wat deur MBF gebring is, wat aanvanklik deur die Provinsiale EXCO-verteenwoordiger en die raad van MPM aanvaar is, was nooit geïmplementeer nie en min aandag is daaraan gegee deur die Munisipale Finansiële Hersteldiens van Nasionale Tesourie (MFRS). Niks in die MFRP dwing MPM om die meer as 700 wetlik verklaarde dispute op te los nie, wat, indien dit korrek hanteer word, baie sal kan help om vertroue in die munisipaliteit te herstel en feitlik onmiddellik 'n groot positiewe impak op die invorderingskoers vir munisipale dienskoste te hê.
MBF het aan die MFRS geskryf om die tekortkominge van hul MFRP uit te wys en sal waarskynlik aansoek doen om die plan tersyde te stel, tensy dit aangespreek word. Terwyl die plan hopelose bestuur, swak finansiële beheer en 'n gebrek aan toesig as sistemies by MPM erken, stap dit katvoet om hierdie kwessies en bied dit nie die praktiese oplossings wat desperaat nodig is om herstel te bewerkstellig nie. Die plan verontagsaam die behoefte aan inligtingvloei na sleutelbelanghebbendes in die gemeenskap, en maak geen voorsiening vir openbare deelname nie.
MBF nooi inwoners, sake-eienaars en belastingbetalers uit om ons kantore by Kerkstraat 18A, Frankfort op Maandae tot Donderdae van 08h30 tot 16h00 en Vrydae 08h30 tot 12h00 te besoek. Bel of stuur 'n WhatsApp-boodskap aan Marina by 079 145 4295. Besoek ons webwerf www.mafubebf.org en volg ons op Facebook.
Comments